2Ch 30 | Ndebele | STEP | UHezekhiya wasethumela kuIsrayeli wonke loJuda, wasebhalela loEfrayimi loManase izincwadi, ukuthi beze endlini yeN kosi eJerusalema ukwenzela iN kosi uNkulunkulu kaIsrayeli iphasika.

2 Chronicles 30

Abantu bagcina iphasika

1 UHezekhiya wasethumela kuIsrayeli wonke loJuda, wasebhalela loEfrayimi loManase izincwadi, ukuthi beze endlini yeNkosi eJerusalema ukwenzela iNkosi uNkulunkulu kaIsrayeli iphasika. 2 Ngoba inkosi yelulekana lezikhulu zayo lebandla lonke eJerusalema ukwenza iphasika ngenyanga yesibili ^a. 3 Ngoba babengelakukwenza ngalesosikhathi ^b ngoba abapristi babengazingcwelisanga ngokweneleyo, labantu babengabuthananga eJerusalema ^c. 4 Lodaba lwaluqondile emehlweni enkosi lemehlweni ebandla lonke. 5 Basebemisa ilizwi ukwedlulisela isimemezelo kuIsrayeli wonke ^d kusukela eBherishebha kusiya koDani ^e, ukuthi bazekwenzela iNkosi uNkulunkulu kaIsrayeli iphasika eJerusalema; ngoba okwesikhathi eside babengenzanga njengokubhaliweyo. 6 Ngakho izigijimi zahamba kuIsrayeli wonke loJuda zilezincwadi ezivela esandleni senkosi leziphathamandla zayo, langokomlayo wenkosi ^f zisithi: Bantwana bakoIsrayeli, buyelani eNkosini, uNkulunkulu kaAbrahama, uIsaka, loIsrayeli ^g, njalo izabuyela kwabaphunyukileyo abasele kini esandleni samakhosi eAsiriya ^h. 7 Njalo lingabi njengaboyihlo lanjengabafowenu ababephambuka eNkosini uNkulunkulu waboyise ⁱ, yaze yabanikela ekuchithweni njengoba libona ^j. 8 Khathesi lingaqinisi intamo yenu njengaboyihlo; zinikeleni ^{▼▼ zinikeleni Heb nika isandla.} eNkosini, lingene endlini yayo engcwele eyingcwelise kuze kube nininini ^l, likhonze iNkosi uNkulunkulu wenu, ukuze ukuvutha kolaka lwayo kubuyele emuva kusuke kini ^m. 9 Ngoba ekubuyeleni kwenu eNkosini, abafowenu labantwana benu bazathola izihawu phambi kwababathumbileyo, ukuze babuye kulelilizwe ⁿ. Ngoba iNkosi uNkulunkulu wenu ilomusa ^o lesihawu ^p, kayiyikuphendula ubuso busuke kini uba libuyela kuyo ^q. 10 Ngokunjalo izigijimi zedlula zisuka emzini zisiya emzini elizweni ^r lakoEfrayimi lelakoManase kuze kube koZebuluni ^s; kodwa bazihleka baziklolodela ^t. 11 Kube kanti abanye bakoAsheri labakoManase labakoZebuluni bazithoba, beza eJerusalema ^u. 12 LakoJuda isandla sikaNkulunkulu sasikhona ukubanika inhliziyonye ukwenza umlayo wenkosi leziphathamandla ngelizwi likaJehova ^v.

13 Kwasekubuthana eJerusalema abantu abanengi ukwenza umkhosi wesinkwa esingelamvubelo ngenyanga yesibili, ibandla elikhulu kakhulu ^w. 14 Basebesukuma basusa amalathi ayeseJerusalema, lawo wonke amalathi okutshisela impepha bawasusa ^x, bawaphosela esihotsheni iKidroni ^y. 15 Basebehlaba iphasika ngolwetshumi lane lwenyanga yesibili ^z; abapristi lamaLevi basebeyangeka ^aa, bazingcwelisa, baletha iminikelo yokutshiswa endlini yeNkosi ^ab. 16 Basebesima endaweni yabo ejwayelekileyo njengendlela yabo ngokomlayo kaMozisi umuntu kaNkulunkulu ^ac; abapristi bafafaza igazi elalivela esandleni samaLevi. 17 Ngoba babebanengi ebandleni ababengazingcwelisanga; ngakho amaLevi ayephezu kokuhlatshwa kwamaphasika kwalowo lalowo owayengahlambulukanga ukubangcwelisela iNkosi. 18 Ngoba ixuku labantu, abanengi bakoEfrayimi, loManase, uIsakari, loZebuluni babengazihlambululanga ^ad, kube kanti badla iphasika kungenjengokubhaliweyo. Kodwa uHezekhiya wabakhulekela wathi: INkosi elungileyo kayimenzele inhlawulo yokuthula ^ae, 19 wonke olungise inhliziyo yakhe ukudinga uNkulunkulu, iNkosi uNkulunkulu waboyise, lanxa kungenjengokuhlanjululwa kwendawo engcwele ^af. 20 INkosi yasimuzwa uHezekhiya, yabelapha abantu.

21 Abantwana bakoIsrayeli abatholakala eJerusalema basebesenza umkhosi wesinkwa esingelamvubelo insuku eziyisikhombisa ngentokozo enkulu; lamaLevi labapristi bayidumisa iNkosi insuku ngensuku, ngezinto zokuhlabelela ngamandla eNkosini ^ag. 22 UHezekhiya wasekhuluma ngomusa kumaLevi wonke ayelokuqedisisa elwazini oluhle lweNkosi. Badla-ke okomkhosi omisiweyo insuku eziyisikhombisa benikela iminikelo yokuthula ^ah, beyidumisa iNkosi, uNkulunkulu waboyise ^ai. 23 Ibandla lonke laselicebisana ukwenza ezinye insuku eziyisikhombisa; benza ezinye insuku eziyisikhombisa ngentokozo ^aj. 24 Ngoba uHezekhiya inkosi yakoJuda wanika ibandla amajongosi azinkulungwane lezimvu eziyizinkulungwane eziyisikhombisa, leziphathamandla zanika ibandla amajongosi azinkulungwane lezimvu ezizinkulungwane ezilitshumi; labapristi bazingcwelisa ngobunengi ^ak. 25 Ibandla lonke lakoJuda, labapristi lamaLevi, lebandla lonke elivela koIsrayeli, labezizweni ababevela elizweni lakoIsrayeli, lababehlala koJuda, basebethokoza ^al. 26 Kwasekusiba khona intokozo enkulu eJerusalema, ngoba kusukela ensukwini zikaSolomoni indodana kaDavida inkosi yakoIsrayeli kakuzanga kube khona okunjalo eJerusalema ^am.

27 Basebesukuma abapristi lamaLevi ^an, babusisa abantu ^ao; ilizwi labo laselizwakala, lomkhuleko wabo wafika endaweni yakhe yokuhlala engcwele emazulwini.